Një uruguaian dhe një argjentinas priten që sot në Gjirokastër, ndërsa nesër pritet një portorikan. Me ekipin janë bashkuar dje edhe 8 të rinj, që do të testohen
Gëzim Beqiri
Të tjerë futbollistë kanë qenë në provë dje në ekipin e Luftëtarit. Bashkë me gjashtë të parët, janë 13 futbollistë të ardhur nga ekipet e tjera për t’u provuar dhe për të fituar besimin e dyshes së trajnerëve nga Uruguai. Po dje stafit teknik i është shtuar edhe përgatitësi i portierëve, Madrid Muxhai, me origjinë nga Gjirokastra, por që ka luajtur dhe ka drejtuar ekipin e Tomorit të Beratit. Dje Muxhai ka zhvilluar ditën e parë të stërvitjes me katër portierët, veçmas grupit të futbollistëve. Në fillim janë përgatitur futbollistët, që mund të konsiderohen pjesë e listës së federimit dhe më vonë futbollistët e ardhur dhe ata që kaluan testin e parë. Eshtë zhvilluar edhe një ndeshje kontrolli. Nga të ardhurit e djeshëm bie në sy fakti se të gjithë janë të moshës nën 21 vjeç, tre prej tyre nga ekipi i të rinjve të Partizanit. Gaba, Mersini, Biraçi dhe Kazma e kaluan testin e parë dhe tashti bashkë me të ardhurit e dy ditëve më parë, Dosti, Kasa, Toçi, Janku, Bregasi, Çakalli, si dhe 8 futbollistët që u paraqitën dje, janë nën vëzhgimin e stafit teknik, që nuk është mjaftuar vetëm me stërvitjen e djeshme.
ZGURO – Po dje ka rinovuar kontratën mbrojtësi pogradecar Vangjel Zguro, i cili u largua përkohësisht pranë familjes së tij në SHBA, por dëshira për të vazhduar karrierën në Shqipëri e ktheu pranë Luftëtarit, edhe pse kishte më parë një kërkesë nga Kamza. Zguro erdhi në Gjirokastër në merkaton e janarit dhe ishte titullar në krahun e majtë të mbrojtjes. Me ardhjen e tij, ky pozicion është i zgjidhur dhe tashmë stafi teknik ka edhe një titullar më shumë n ga formacioni i sezonit të fundit.
TË HUAJT – Sipas njoftimit më të fundit, pritet të mbërrijnë në Gjirokastër një futbollist nga Uruguai, 31-vjeçari Nunies, si dhe një argjentinas. Të mërkurën pritet një portorikan, ndërkohë që deri në fundjavë do të plotësohet numri i futbollistëve të huaj, që do t’i bashkohen Luftëtarit.
.