Laçi ka arritur që të fitojë me vështirësi ndaj Dinamos me shifrat 2-1. U mendua se ky takim do të ishte shumë i lehtë për kurbinasit që arritën të shënonin që në sekondën e 33 me Guindo. Mbrojtja kryeqytetase nuk kishte hyrë ende në fushë dhe ishte e përgjumur, ndërsa sulmuesi i Laçit goditi në cepin e rrjetës.
Barazimi do të vinte nga Fejzulla në minutën e 60 pas një goditje që në pamje të parë dukej pa pretendime, por falë gabimit të Dajsinanit, te Dinamo duhej të festonin. Por për ekipin e Vanolit nuk ka frymëmarrje as në këtë rast pasi Zarubica shënoi në minutën e 85 nga 11 metrat duke shfrytëzuar goditjen e gabuar që Reginaldo i bëri Shehut në zonë. Më poshtë gjeni intervistat e trajnerëve për “Supersport”:
Vanoli: “Goli i parë ishte një gabimi yni, individual. Shpresoj se ai lojtar që e bëri atë gabim, të mos mendoj se ka ardhur për pushime këtu. Pastaj bëmë ndeshje të mirë. Nuk e kam zakon të flas për arbitrat, por nuk e di se çfarë pa ai te penalltia. Presidenti po investon shumë, ne jemi një klub i madh dhe nuk dua që të ndëshkohemi nga faktorët e jashtëm, vetëm nga mos merita jonë. Që kur kam ardhur unë këtu kemi gabuar vetëm në një ndeshje, megjithëse pikët nuk kanë ardhur akoma.
Duro: “Kushtet atmosferike ishin të këqija. Pësuam një gol në momentin kur Dinamo nuk po shkonte asnjëherë në portë. Pastaj rrezikuam, por ndeshjen duhej ta mbyllin më para. Ky trepikësh na jep qetësi, jemi edhe në finalen e Kupës së Shqipërisë. Kam qenë i stresuar gjatë gjithë kohës pasi po frynte një erë skandaloze dhe mund të ndodhte gjithçka. Dinamo është në Kategorinë e Parë për mua, ishte më e qetë se ne, ne kishim objektiva dhe rrezikonim më tepër”.