Luçiano Spaleti ka ndërtuar një nga skuadrat më të forta momentalisht në Europë, por sa pak po flitet për ta në media. PSG, Reali i Madridit dhe Napoli janë tre klubet e vetme nga 5 ligat më të forta në Kontinentin e vjetër që nuk njohin humbje këtë sezon. Por nëse dy të parat janë superfuqi ekonomike dhe me yje të mbushur në çdo repart të fushës, e njëjta gjë nuk mund të thuhet për të kaltrit.
Klubi italian numëron 9 fitore dhe 2 barazime në Serie A, ndërsa në Ligën e Kampionëve kanë 4 fitore në po aq ndeshje të zhvilluara. Në total Napoli ka shënuar 43 gola mes kampionatit dhe Europës, si dhe ka pësuar vetëm 13 të tillë. Një shifër jashtëzakonisht e lartë, mjaft afër klubeve si Mançester Siti apo Bajerni i Mynihut./Halit Delibashi-Sport Ekspres/