Futbolli luhet për tifozët, por shpesh herë këta të fundit e teprojnë. Marrëdhënia e tifozëve me një lojtar të vetëm ka të mirat dhe këqijat e veta. Në rastin e dytë kthehet në një problem, që e penalizon lojtarin të përqendrohet dhe të japë më të mirën në fushën e blertë. Ofendimet e tifozëve kundërshtarë kanë ndikimin e vet, por kur fillojnë e të ofendojnë dhe tifozët e tu, situata bëhet e padurueshme.
Hektor Belerin, mbrojtësi spanjoll i Arsenalit, ka zbuluar raportin e vështirë që ka me një pjesë të tifozëve të ekipit. 23-vjeçari, i njohur për flokët e tij të gjata, ofendohet dhe kritikohet për imazhin dhe stilin e tij dhe situata bëhet shpesh herë problematike.
“Disa tifozë arrijnë të bëhen shumë ofendues. Pjesa më e madhe e fyerjeve më vijnë online, por disa dëgjohen dhe në stadium. Më thërrasin “lesbike”, sepse unë mbaj flokë të gjata dhe vazhdojnë me të tjera ofendime homofobike. Kur luaj keq, situata bëhet e paqëndrueshme. Tani jam mësuar, por të bën të ndihesh keq. Problemi qëndron se tifozët kanë idenë e tyre se si duhet të vishet një futbollist, si duhet të sillet dhe çfarë duhet të flasë.
Nëse sillesh ndryshe nga ajo çfarë pritet, bëhesh një objektiv i njerëzve. Ekziston një presion i madh dhe është diçka e shumë e rrezikshme, sepse në jetë duhet të jemi të lirë të shprehim veten ashtu siç jemi në të vërtetë.
Periudha më e keqe ishte para një viti e gjysmë, kur u detyrova të mbyllja profilin tim në rrjetet sociale, për shkak të fyerjeve të shumta. Çdo ditë përpiqem të mësoj se si ta luftoj këtë situatë në mënyrën më të mirë të mundshme”, përfundon Hektor Belerin, mbrojtësi i majtë i ekipit të Arsenalit.
