Kamza në Ohër, largohen 3 futbollistë

0

Ekipi i Kamzës ka nisur fazën përgatitore në qytetin e Ohrit në Maqedoni. Skuadra debutuese e Superiores në këtë sezon do të mundohet të arrijë formën maksimale para fillimit të sezonit. Trajneri Ramadan Ndreu do të ketë 2 javë në dispozicion për të arritur maksimumin dhe për të rritur formën e lojtarëve. Numri një i pankinës ka humbur shërbimet e 3 lojtarëve me nisjen e fazës përgatitore. Mesfushorët Aristotel Koleci dhe Luarts Lame janë larguar nga ekipi i Kamzës, pasi kanë kërkuar që të kenë më shumë hapësira, në të njëjtën linjë është edhe mesfushori tjetër që u afrua po këtë verë Imer Zuna.

KOLECI – LAME – Më të dhimbshme për tifozët e Kamzës janë largimet e Aristotel Kolecit dhe Luarts Lames, pasi të dy kanë vite që luajnë me fanellën e këtij ekipi. Koleci është bashkuar me ekipin e Kamzës në vitin 2012 dhe ka zgjedhur të largohet pas 5 sezonesh me këtë fanellë. Vitin e kaluar Koleci ka luajtur në 19 ndeshje dhe ka filluar si titullar 10 prej tyre duke shënuar edhe 1 gol. Lame është një tjetër beniamin, pasi është bashkuar me ekipin në sezonin futbollistik 2011-2012 dhe zgjedh të largohet pas 6 sezonesh. 24-vjeçari ka luajtur sezonin e shkuar në 15 ndeshje, 9 i ka nisur si titullar dhe ka shënuar edhe një gol. Largimi i të dyve nuk ka qenë i lehtë, por dëshira për të luajtur ka bërë që të marrin këtë vendim.

ZUNA – Një tjetër futbollist që ka preferuar që të vazhdojë karrierën në një tjetër ekip është Imer Zuna. Mesfushori ishte afruar në merkaton e kësaj vere nga ekipi i Ilirisë. Ai shënoi edhe një gol në miqësoren kundër skuadrës së Laçit, por nuk ka mjaftuar për të fituar një vend dhe hapësira në formacion. Duke u gjendur përpara një situate të tillë, Zuna ka menduar të vazhdojë karrierën në një tjetër ekip që mund të luajë më shumë dhe të ketë më shumë minuta në këmbë.

You might also like
Leave A Reply

Your email address will not be published.