Alban Bushi ka folur për mikrofonin e “Supersport“-it pas përmbysjes spektakolare që ekipi i tij bëri kundër Rumanisë U21. Trajneri i Shpresave kuqezi është pyetur edhe në lidhje me Kombëtaren A, sa i përket mundësisë për të shkuar në Euro 2024. Bushi shprehet se ka besim që skuadra e Silvinjos do të shkojë në Gjermani, madje, sipas tij, mund të kalojnë edhe fazën e grupeve në Europian.
“Unë e kam thënë që para 3-4 viteve. Shqipëria jo vetëm që do të shkojë në Europian, por do të kalojë grupet në Europian. Ne jemi më brenda dhe e njohim më mirë situatën. Punohet shumë me ekipet kombëtare. Nga U15 e deri lart. Unë dua t’i falenderoj të gjithë, sidomos drejtorin e ri që ka ardhur, patjetër edhe Federatën.
Punohet jashtëzakonisht shumë me ekipet kombëtare, duke i skautuar ata, duke i parë, duke i dërguar video gjatë kohës kur jemi pushim dhe nuk kemi ndeshje. Jemi gjithmonë në kontakt me lojtarët për të arritur këtu lart. Jemi shqiptarë, kemi zemër shumë të madhe. Pavarësisht se nuk jemi Gjermania apo Franca, por kur japim zemrën në fushë, bashkë me tifozët mund të bëjmë gjëra shumë të mëdhaja“, është shprehur Alban Bushi./Halit Delibashi-Sport Ekspres/