“Ishte injorant”! Lojtari brazilian kthehet për të sulmuar presidentin e Bylisit, ndërton skenar filmash: Ika me vrap nga Shqipëria se…

0

Shpeshherë në Shqipëri zgjedhin që t’i besojnë lojtarëve të huaj që nuk kanë asnjë CV të pasur dhe i heqin mundësinë talenteve shqiptarë për të treguar aftësitë e tyre. Rroga që fitojnë këta futbollistë të huaj është shumë herë më e lartë sesa produkti vendas, ndërsa edhe damka e vendosur në fundin e bashkëpunimit është jo pak në përmasa.

Në gjithë këto vite kemi pasur shumë raste të lojtarëve të huaj që kanë thënë fjalë të shumëllojshme kundër ekipeve shqiptare dhe presidentëve të tyre. Një rast i ngjashëm ka ndodhur edhe me Vinsente De Paula Mercedes. Këtë herë futbollisti brazilian kthehet që të sulmojë presidentin e Bylisit, Kapllanajn. Historia është e vjetër dhe e konsumuar, por lojtari e rikthen në vëmendje te “ESPN Brasil” duke e kthyer në skenë filmi:

“Unë bisedova me “Fox Sport” përpara se të nisesha për në Shqipëri dhe ata më paralajmëruan. Më thanë se duhej ta merrja në konsideratë vetëm nëse ishte mundësia e vetme. Por kur kërkon që të arrish në nivelin e lartë me çdo kusht, ndonjëherë bëhesh edhe i verbër, më kuptoni? Thjesht dëshiron që të luash, nuk do të dish më shumë. Sapo arrita në Shqipëri ishte e tmerrshme. Presidenti i Bylisit më premtoi shumë gjëra dhe në fund më dolën të kundërta.

Kontrata ishte gjithashtu e kundërt. Më premtuan për një apartament që nuk e kisha kurrë, për rrogat që nuk u morën dhe shumë gjëra që nuk ndodhën. Në ekip ishte një lojtar nga Argjentina dhe që fliste në gjuhën portugeze shumë mirë. Sa herë që shkoja të flisja me presidentin, merrja edhe këtë futbollist pasi e njihte mirë edhe anglishten.

Kështu flisja me presidentin falë përkthimit. Sa herë që kërkoja gjërat që ai kishte premtuar dhe ishin në kontratën time, më thoshte se do t’i jepte ditën tjetër. Gjithmonë duke e shtyrë për ditën tjetër dhe të nesërmen nuk vinte asgjë. Më gënjeu për të gjitha. Akomodimi në klub ishte i tmerrshëm. Më thanë se do të qëndroja për tre ditë atje sa të gjendej apartamenti im. Nuk kishte ajër të kodicionuar dhe ishte shumë ftohtë. Bisedova me mikun tim që të rrija në shtëpinë e tij pasi kushtet ishin shumë të tmerrshme në akomodimin e klubit. Nuk mora asnjë pagesë dhe çështja shkoi në FIFA.

Kur ndërroi jetë mamaja? Më ka mbetur peng. Ishte e vjetër dhe doktorët i kishin dhënë ditët e mbetura si afat. Fola me presidentin që të shkoja në Brazil që të shihja mamanë time dhe ta ndihmoja në një farë mënyre për gjërat e fundit që kërkonte përpara se të ndërronte jetë. Por kjo nuk u bë e mundur se presidenti i Bylisit ishte shumë injorant. Ai më thoshte se nuk mund të linte që të shkoja në Brazil pasi kishte frikë se unë nuk do të kthehesha më në Shqipëri.

Si u largova? I kërkova klubit që të largohem pasi nuk u mbajtën premtimet dhe rrogat po vonoheshin. Presidenti më tha se do të flisnim së bashku. Por pas këtij momenti nuk ishte koha e duhur për të folur mirë së bashku. Për këtë arsye kam bërë gjërat gati shpejt dhe me biletat e prera u largova që nëmëngjes. U largova duke vrapuar nga Shqipëria pasi nëse ai e mësonte se unë po ikja, mund të bllokonte daljen. Nuk e di se çfarë mund të më ndodhte atje dhe prandaj ika me vrap drejt aeroportit”, ka thënë Vinsente. /Sport Ekspres/

You might also like

Leave A Reply

Your email address will not be published.