Trajneri Reja ka dalë në konferencën për shtyp përpara takimit miqësor që do të zhvillojë Shqipëria ndaj Uellsit. Kjo përballje do të luhet në ditën e nesërme në 18:00, teksa trajneri i kuqezinjëve ka zbuluar thuajse gjysmën e formacionit. Ajo që duhet të nënvizohet është fakti se Amir Abrashi do të jetë me shiritin e kapitenit dhe nga minuta e parë do të provohet Cekici.
“Skuadra është e lodhur, por ne kemi punuar mirë gjatë këtyre ditëve dhe të pushojmë pak për të marrë forcat. Nuk është e lehtë të luash kundër Uellsit. Pika e tyre më e fortë është mesfusha dhe sulmi. Kanë lojtarë në nivelit të lartë, bëjnë futboll shumë të mirë. Janë të shpejtë. Pika e tyre më e dobët është në mbrojtje. Duhet të luajmë me kundërsulmin dhe t’i zëmë në befasi.
E kam vendosur sesi do të luajmë ndaj Uellsit, kam pak dyshime vetëm për pjesën e sulmit. Abrashi do të jetë në fushë si kapiten dhe mund t’i bashkohen Bare dhe Çekiçi. Është momenti që të provojmë Çekiçin që ka luajtur mirë në Turqi. Sa i përket mbrojtjes dihet që Ismajli, Kumbulla dhe Gjimshiti do të jenë treshja e mbrojtjes. Në krahë kam disa mundësi dhe do t’i shqyrtoj edhe njëherë. Do të luajnë të gjithë në këto dy ndeshje”, tha Reja. /Sport Ekspres/