Kukësi mposhti Kamzën në fundjavë dhe diferenca me Partizanin në derbi ka shkuar në shtatë pikë. të kuqtë nesër luajnë në derbi dhe te verilindorët shpresojnë që skuadra e drejtuar nga Skënder Gega të mos fitojë.
Kjo do i jepte mundësinë Kukësit të afrohej edhe më shumë me kreun, sigurisht nëse do ia dalin të fitojnë në Gjirokastër. Gjithsesi triumfi me bluzinjtë është i rëndësishëm qoftë edhe për t’u ngjitur në renditje. Sikurse dihet, edhe në Korçë luhet një ndeshje e rëndësishme mes Skënderbeut dhe Teutës.
Presidenti Gjici fitoren e fundit me Kamzën e shpërbleu skuadrën, ndërkohë që edhe për një triumf tjetër me Luftëtarin do të ketë sërish premio. Një motiv më shumë për futbollistët, që të kërkojnë maksimumin e pikëve në Gjirokastër. Grupi i lojtarëve do të jetë edhe më i plotë, pasi rikthehet lojtarë si kapiteni Shameti, Zguro dhe Rrumbullaku.