Pritjes së madhe i ka ardhur fundi. Leeds United pas 16 vitesh do të rikthehet sërish në Premier League. Elita e futbollit anglez i pret sezonin e ardhshëm, teksa 2 ndeshje para përfundimit të kampionatit skuadra ka siguruar ngjitjen. Madje kanë shansin ta bëjnë rikthimin në Premier League si kampion të Championship në rast se fitojnë takimin e radhës.
Një sukses i jashtëzakonshëm ky për klubin dhe arkitekti i gjithë kësaj arritjeje është një “i çmendur”, Marcelo Bielsa. Trajneri argjentinas njihet për karakterin e tij aspak normal dhe bëmat e kanë përndjekur përgjatë karrierës. Megjithatë duhej që në stolin e Leeds të ulej pikërisht ai në mënyrë që skuadra të luajë mes 20 më të mirave të futbollit anglez./Halit Delibashi-Sport Ekspres/