Komisioni i Etikës dhe Disiplinës në FSHF ka bërë publike sot vendimet e marra për ngjarjet që kanë ndodhur në javën që lamë pas të futbollit shqiptar. Egnatia është i vetmi ekip që bëhet subjekt i Komisionit të Disiplinës sa i përket klubeve të “Abissnet Superiore”-s. Rrogozhinasit janë dënuar me një gjobë prej 100 mijë lekësh për shkak të hedhjes së sendeve në fushë nga ana e tifozëve.
Për të njëjtën masë disiplinore është dënuar edhe FK Tomori, i cili duhet të shlyejë një gjobë prej 50 mijë lekësh. Ndërkohë Apolonia paralajmërohet se në rast të përsëritjes së sjelljes së gabuar nga ana e zyrtarevë të klubit do të marrë ndëshkimin e merituar sipas rregullores nga Komisioni i Disiplinës./Halit Delibashi-Sport Ekspres/
Vendimet e plota të Komisionit të Disiplinës:
- KF Egnatia, për sjellje të gabuar të spektatorëve duke hedhur sende në terrenin sportiv, në bazë të nenit 65/1 dhe 65/3/c të KDS, dënohet me gjobë në masën 100.000 (njëqind mijë) lekë.
- FK Apolonia, në bazë të nenit 12 të KDS, paralajmërohet se në rast të përsëritjes të sjelljes së gabuar të zyrtarëve të klubit, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
- FK Tomori, për sjellje të gabuar të spektatorëve duke hedhur sende në terrenin sportiv, në bazë të nenit 65/1 dhe 65/3/c të KDS, dënohet me gjobë në masën 50.000 (pesëdhjetë mijë) lekë.
- Lojtari i KF Maliqi, Arlind Xaka, për sulm ndaj kundërshtarit, në bazë të nenit 47/1/e të KDS, dënohet me 5 (pesë) ndeshje pezullim nga aktiviteti.
- Lojtari i SH.S Albpetrol, Rudin Nako, për protestë ndaj vendimeve të zyrtarit të ndeshjes, në bazë të nenit 55/2 të KDS, dënohet me 3 (tre) ndeshje pezullim nga aktiviteti.
- Lojtari i Shënkolli, Ded Bushi, për sjellje josportive ndaj zyrtarëve të ndeshjes, në bazë të nenit 48/1/a të KDS, dënohet me 4 (katër) ndeshje pezullim nga aktiviteti.
- Lojtari i KF Bylis U17, Paulin Sinarrapaj, për provokim të publikut, në bazë të nenit 52/1 të KDS, dënohet me 2 (dy) ndeshje pezullim nga aktiviteti.