Futbollisti argjentinas Dario Konka njoftoi dorëheqjen nga futbolli profesionist dy javë para ditëlindjes së 36-të.
Konka, një fantazist shtatshkurtër u bë i famshëm në vitin 2011 teksa u bë lojtari i tretë më i paguar në planet, duke pasur mbi veten vetëm Lionel Mesin dhe Kristiano Ronaldon.
Dario Konka realizoi transferimin e jetës duke firmosur me ekipin kinez Guangzhou Evergrande që pagoi një shumë rekord prej 10 milionë dollarësh për të blerë kartonin e tij nga Fluminense, ndërsa kontrata ishte e pabesueshme për kohën. 13 milionë dollarë në sezon. E thënë ndryshe për një periudhë 2-vjeçare, Konka paguhej më shumë se lojtari si Ibrahimoviç, Eto, Roben, Riberi dhe Uejn Runi.
Në Kinë e justifikoi besimin e klubit duke shënuar 54 gola, ndërsa nuk munguan asistimet, plot 37, shifra këto të regjistruara në 99 ndeshje. Ofertat nga Europa ishin të shumta por me paratë që ka në llogarinë bankare nuk ka se si të jetë bërë pishman për vendimin e marrë.