Sulmuesi Edgar Çani është një ndër futbollistët më të përfolur të Partizanit. Klubi ka nisur një fushatë të hapur për ta larguar, pasi nuk e përfshiu në listën e Europa Leagues, ndërsa i mori dhe numrin “9” sulmuesit shtatlartë. Paga e tij e lartë ka bërë që drejtuesit e klubit të duan ta largojnë.
Çani mund të dërgohet te ekipi B i “demave”, ndërsa burime të ndryshme pranë lojtarit bëjnë me dije se futbollisti ka përgatitur dhe “kundërsulmin”. Duke parë sjelljen e klubit ndaj tij, ai po mendon që të mos largohet nga skuadra e kuqe.
Futbollisti mund të pranojë masat dhe të qëndrojë me të kuqtë. Nga krahu tjetër flitet se futbollisti nuk është paguar rregullisht dhe në horizont mund të ketë dhe një gjyq ndërmjet lojtarit dhe klubit të “demave”.