Merkatoja e fuqishme në hyrje te Kukësi tashmë i lë vendin asaj në dalje, duke bërë që për Skënder Gegën të fillojnë “dhimbjet e kokës“. Et’hemi, Musolli, Rroca, Abazaj dhe largimi i papritur i Telushit pasojnë me lamtumirën e Obanor. Mbrojtësi nigerian ka qenë një titullar i padiskutueshëm te verilindorët, por nga sezoni i ardhshëm nuk do të jetë më pjesë e tyre. Është vetë klubi që njofton ndarjen e rrugëve me lojtarin e prapavijës.
Kontrata e futbollistit afrikan ka skaduar dhe akordi për rinovim nuk është gjetur. Drejtuesit e Kukësit i kanë ofruar një zgjatje të kontratës, por ka qenë dëshira e Obanor për të mos hedhur firmën, pasi dëshiron të ndryshojë ambient. Mbrojtësi mendon se ka ardhur koha e duhur për të nisur një aventurë jashtë Shqipërisë, për këtë arsye i ka dhënë lamtumirën përfundimisht verilindorëve./Halit Delibashi-Sport Ekspres/
NJOFTIM I KLUBIT!
Erhun Obanor nuk është më pjesë e Kukësit! Mbrojtësit nigerian i përfundoi kontrata këtë verë dhe pavarësisht se klubi i ofroi një kontratë të re me kushte shumë të mira, dëshira e futbollistit ishte të provonte një aventurë jashtë Shqipërisë!
Klubi i Kukësit e falënderon mbrojtësin nigerian për kontributin e dhënë me fanellën e Kukësit dhe i uron suksese në të ardhmen. Faleminderit Obi! Thank you Obi!