Vangjel Zguro la Kamzën këtë verë dhe iu bashkua Kukësit. Të dielën do të jetë titullar në takimin kundër ish-ekipit të tij. “Situata është përmirësuar tek ekipi. Shpresojmë të ecim me të njëjtin ritëm dhe të mos ndalemi më”, shprehet fillimisht pogradecari në “Supersport”.
Mbrojtësi i majtë i ka të qarta objektivat: “Akoma nuk jam në maksimumin tim, shpresoj të ambientohem dhe të kem besimin e trajnerit. Uroj të dalim kampion, pasi është edhe objektiv i klubit”.
Zguro flet për rivalin e së dielës dhe sigurisht që do fitoren e Kukësit, edhe pse do ketë përballë shumë miq. “Kamza është ekip i fortë, kam shumë miq aty. Shpresoj që këtë ndeshje ta fitojë Kukësi. Kamzës i uroj suksese, por jo në këtë takim”.