Arbitri Marco Serra ishte faktori kryesor në humbjen e Milanit ndaj Spezias. Ai nuk lejoi vazhdimin e aksionit, por akordoi faull duke anuluar kështu golin e Messias, që do t’i jepte Milanit avantazhin 2-1. Vetëm 2 minuta më vonë Spezia shënoi golin e dytë duke shtangur kështu kuqezinjtë. Arbitri italian e kuptoi menjëherë gabimin dhe kamera në fund të ndeshjes e panë mjaft të shokuar dhe te përlotur për gabimin që kishte bërë.
Federata e arbitrave i ka kërkuar falje klubit të Milanit për gabimin e Marco Serra. Ndërkohë në fundin e takimit, Zlatan Ibrahimovic ka qenë i papërmbajtshëm dhe i inatosur duke shkuar menjëherë për t’i kërkuar llogari gjyqtarit. Por pasi e ka parë në lot, ka ftuar edhe shokët e tjerë të skuadrës për ta qetësuar. “Zoti” tregohet i mëshirshëm… /Elio Hajdari-Sport Ekspres/