(VIDEO) Realin s’e ndal “Special One”, mbetet “mbret” i Europës!
Për të dytin vit radhazi, këtë radhë më pak se 400 kilometra larg Tiranës, Real Madridi është shpallur fitues i Superkupës së Europës, pasi mundi me rezultatin 2-1 Mançester Junajtidin. Zidan mund kështu Murinjon, që ka drejtuar edhe “galaktikët” në karrierën e tij, teksa nuk ka arritur të fitojë Champions, siç bëri dy herë “Zizu”. Një ndeshje e luajtur në stadiumin e Shkupit, “Telekom Arena”, ku kanë qenë edhe shumë tifozë të pranishëm.
Real Madrid shënoi i pari me Kasemiron pas 24 minutash lojë. Mesfushori ishte në pozicion jashtë loje, por gjyqtari Roki e quajti gol të rregullt. Kjo i acaroi “Djajtë e kuq”, por ata nuk u përgjigjën me lojë. Përkundrazi, madrilenët veçse shtuan ritmin e aksioneve të tyre sulmuese dhe dominuan gjithë pjesën e parë. 45’ e dyta filluan të ekuilibruara, por Real Madrid u tregua sërish më dinak. Në të 52’ Isko shënoi golin e dytë për kampionët e Evropës me një aksion shembullor. Kjo nxiti anglezët për të luajtur, sidomos me futjen e mesfushorit Felaini, të cilin Murinjo e përdori si pykë.
Goli që ngushtoi disavantazhin e takimit nuk vonoi. Këmbëngulja e Junajtidit u shpërblye në të 62’, kur Lukaku shënoi një gol që për të ishte si lojë fëmijësh, por portierin De Gea i cili praktikisht i dha “asist” duke grushtuar topin para këmbëve të belgut, pas një gjuajtje nga jashtë zone të Mkitarianit. Junajtidi fitoi guxim, ashtu si edhe hapësira, në fushë, ndonëse nuk hoqi dorë nga topat e gjatë.
Rashford, pas një diagonaleje fantastike nga Mkitarian, pati rastin ideal për të shënuar, por e majta e tij, edhe pse ishte thuajse tek për tek me spanjollin De Gea, përfundoi dy metra larg shtyllës së dytë. Kështu, Junajtid nuk ia doli të barazojë, ashtu si as Real Madrid të thellojë avantazhin. Fatkeqësisht për Ronaldon, kjo nuk ishte mbrëmja e tij, sepse luajti vetëm pak minuta nga fundi, për shkak se ka vetëm pak ditë që është rikthyer në stërvitje.
https://www.youtube.com/watch?v=8dYgsdTDsJI
https://www.youtube.com/watch?v=PmSZPqHvMHY
https://www.youtube.com/watch?v=MBF_EG-DtJs