E diela e djeshme mund të përkufuzohet si e diela shqiptare, teksa pamë golin e Bernard Berishës, dy asist të Celinës në Ligue 1 si dhe debutimin e mbrojtësit të Kombëtares shqiptare Marash Kumbulla përballë kampionëve në fuqi, Juventusit. Gjithashtu dhe një tjetër lojtar shqiptar bëhet protagonist në kampionatit letonez. Bëhet fjalë për mbrojtësin shqiptar, i cili ka luajtur edhe nën ngjyrat kuqezi, Herdi Prenga. 26 vjeçari fitoi një penallti në minutën e 96-të, të cilën e transformoi në gol duke i dhënë 3 pikë mjaft të rëndësishme skuadrës së tij, Rigës.
Me këtë fitore Riga është shumë pranë shpalljes së titullit kampion, teksa ndodhet 6 pikë më lartë se ndjekësja më e afërt, RFS. Prenga ka shënuar vetëm 1 herë në këtë sezon, por ky gol ka aromën e titullit kampion. Në rast se Riga fiton kampionatin, ajo do të marë pjesë në kualifikueset e Champions League. /Elio Hajdari-Sport Ekspres/