Kukësi kaloi në gjysmëfinale të Kupës së Shqipërisë dhe në fund të takimit me Teutën u ndëshkuan me kartonë të kuq Uilliam Kordeiro dhe Erlis Frashëri. Korçari e teproi me goditjen e tij ndaj brazilianit, që shpëtoi mirë.
Futbollisti i Kukësit reagoi dhe kjo u pa nga arbitri i ndeshjes. Të dy jashtë dhe tashmë pritet të shihet se çfarë do të ndodhë me ta. Me shumë mundësi do të kalojnë në Komisionin e Disiplinës, çka do të bënte që ata të rrezikojnë të humbasin ndeshjen e radhës në kampion.
Gjithsesi mbetet për t’u parë, pasi edhe Grent Halili për gjest antisportiv u ndëshkua me karton të kuq në sfidën me Flamurtarin, por organi disiplinor në FSHF e mbylli njërin asokohe, duke mos e dënuar sulmuesin e bardhebluve.