Kurtua! Mjafton ky emër, ky garanci, për të ndalur Brazilin dhe për ta dëbuar jashtë Rusi 2018… Belgjika nuk ndalet dhe arrin kualifikimin në gjysmëfinale, duke eliminuar pesë herë kampionët e botës në një ndeshje emocionuese, me raste, episode të dyshimta, shtylla dhe sidomos raste pa fund nga Seleçao. Brazili në lot, ashtu si edhe ylli i saj Nejmar, që në fund provoi të shënonte me një goditje të bukur, por fluturimi i portierit belg bëri që gjithçka të merrte fund, ashtu si shpresat e kombëtarës së artë…
Pjesa e parë foli për skuadrën belge, teksa Brazili ishte i pafat, me një shtyllë të shpejtë të Tiago Silvës dhe disa raste. Por, autogoli i pafat i Fernandinjos i hapi rrugën më lehtësisht djemve të Martinezit. Më pas, do të ishte një kundërsulm vrastar, me Lukakun, që shërbeu për De Brujne, i cili me një diagonale të fortë e dërgoi topin në rrjetë.
Seleçao u përpoq të reagonte, me Gabriel Zhesusin, por edhe Dagllas Kostën në pjesën e dytë, teksa edhe Firmino pati një rast të mirë. Por, gafa e Kutinjos, fare pranë portës, një penallti e lëvizshme, ishte padiskutim rasti më flagrant, edhe pse në fund, emocionet dhe ritmet e zemrës u shtuan, kur Nejmar provoi me një goditje të harkuar mjeshtërisht, por Kurtua fluturoi dhe grushtoi në goditje nga këndi.
Pas pesë minutash shtesë, arbitri vërshëlleu fundin… Brazili i bashkohet Argjentinës, Gjermanisë, Portugalisë dhe Spanjës, që i kishin dhënë lamtumirën Botërorit.
“Kazan Arena”, Kazan
Brazil-Belgjikë 1-2
Shënues: Augusto 75’/ Fernandinjo 14’ (a), De Brujne 31′
Brazil: Alison; Fagner, Silva, Miranda, Marselo, Fernandinjo, Paulinjo (Renato Augusto 73′), Uillian (Firmino 46′), Kutinjo, Nejmar, Gabriel Zhesus (Kosta 58′). Tr.: Tite
Belgjikë: Kurtua; Vertongen, Alderveild, Vitsel, De Brujne, Çadli (Vermalen 82′), Meunier, Hazard, Lukaku (Tilemans 86′), Felaini. Tr.: Martinez
Gjyqtar: Milorad Maziç (Serbi)
Kartone të verdhe: Alderveild, Meunier
Golat
Min 75‘ Renato Augusto ngushton diferencën me kokë, i sapofutur. Asist i Kutinjos
Min 31′ De Brujne, me një kundërsulm perfekt, dyfishon, me diagonale të fortë nga krahu! Mposhtet sërish Alison
Min 13′ Fernandinjo devijon i pafat një krosim nga goditja e këndit dhe Belgjika kalon në avantazh
Episodet
PJESA E DYTE
Min 83′ Kutinjo shpërdoron. Nejmari i dhuron një pasim perfekt, por goditja e mesfushorit është totalisht e gabuar, mbi traun e portës
Min 80′ Augusto! Çfarë rasti Brazili. Sa pranë golit. Sërish mesfushori, por topi i goditur kalon ngjtur me shtyllën, teksa Kurtua e ndjek vetëm me sy…
Min 72′ Dagllas Kosta, në diagonale, vendos në provë Kurtua, teksa pasi portieri pret, topi përfundon te Nejmar, që godet, por gjen murin belg në mbrojtje
Min 62′ Hazard i afrohet golit të tretë, edhe pse nuk shënjestron aspak portë braziliane. Asist i De Brujne
Min 61′ Dagllas Kosta provon me të djathtën, por gjen përgjigjet e super Kurtua
Min 56’ Gabriel Zhezus, në zonën e rreptësisë, pasi kalon me topin poshtë këmbëve Vertongenin, pengohet nga Kompani, që nuk prek aspak topin, që ishte larguar në të majtë nga sulmuesi. Arbitri serb, Maziç, ndërpret lojën, konsultohet me VAR dhe pasi merr “ok”, vijon lojën duke mos akorduar penallti. Ka protesta braziliane.
Min 55′ Zhesus, me një ikje të bukur, ndez sfidën, teksa goditja e tij bllokohet nga portieri Kurtua
PJESA E PARE
Min 45+1 Mbyllet pjesa e parë
Min 41′ Kompani devijon nga goditja këndit, por Alison pret
Min 40’ De Brujne provon në goditje dënimi, por Alison grushton në goditje këndi, i mirëpozicionuar dhe i pabefasuar
Min 35’ Gabriel Zhesus… Marselo, nga krahu i majtë, kroson në qendër, me të majtën, Gabriel Zhesus, i pozicionuar në qendër, godet me kokë, por topi del jashtë pa pasur shumë shpejtësi
Min 30’ Në zhvillimet e një spastrimi të shkurtër të mbrojtjes belge, topi mbërrin te Nejmar që, nga 25 metra larg portës, kontrollon dhe qendërzohet duke goditur, por topi i nr.10 të Brazilit devijohet në goditje këndi
Min 26′ Provon Marselo, por topi i goditur prej tij nuk ka forcë dhe Kurtua e bën të vetin
Min 9’ Përgjigjet Belgjika, me Felainin, i cili provon të trembë portën braziliane, por topi i goditur prej tij del jashtë
Min 8’ Shtyllë Brazili! Goditje këndi nga e majta, Paulinjo kroson për Silvën që, i futur në zonë dhe pranë shtyllës së parë e devijon, por topi godet shtyllën.