Oleksandër Usik është bërë boksieri i parë në histori që unifikon katër titujt botëror në peshën kruizer, pasi mposhti Murat Gasiev në Moskë. Ukrainasi triumfoi me pikë, pas vendimit unanim të gjyqtarëve.
Me këtë sukses, Usik bëhet i pari që fiton edhe trofeun “Ali” në Super Serinë e Boksit Botëror. Përpara duelit, rusi Gasiev mbante brezat e kampionit në versionet WBA dhe IBF. Por pas fitores, 31-vjeçari Usik, arriti të unifikonte katër titujt që përmban pesha kruizer.
Ukrainasi u paraqit në duel si kampion i brezave WBO dhe WBC. Sfida për të përcaktuar kampionin absolut të peshësh kruizer ishte parashikuar të zhvillohej në muajin maj, por u shty pas dëmtimit që Usik pësoi në brryl.