Kukësi ka probleme para ndeshjes me Laçin. Skuadra verilindore nuk do të ketë në dispozicion për ndeshjen me Laçin kapitenin Ylli Shameti dhe mbrojtësin qendror Gëzim Krasniqi. Ky i fundit e ka mbyllur sezonin pas një dëmtimi në gju në sfidën e fundit me Kastriotin.
Për të mos mjaftuar këta të dy, edhe Irakli Dzaria ka probleme shëndetësore. Gjeorgjiani, sikurse mëson Sportekspres.com, prej disa ditësh ndodhet i shtruar në Spitalin Infektiv në QSUT.
Dzaria po kalon një virozë, që është shoqëruar me temperaturë të lartë. Gjatë kësaj periudhe ka qenë në nën mbikëqyrjen e mjekëve. Mesfushori ka kryer analiza të shumta për të mësuar ekzaktësisht problemin e tij shëndetësor.
Trajneri Ernest Gjoka do të duhet të bëjë pa të në transfertën e vështirë me Laçin. Duke qenë se Teqja duhet të tërhiqet në mbrojtje, ku mungesat janë të shumta, duhet gjetur një zgjidhje për qendrën e mesfushës. Limaj dhe Rroca janë opsionet kryesore, ndërkohë që edhe Musolli është rikuperuar dhe pret shansin e tij.