Alban Hasani ka folur në një intervistë në “Sport Magazine” që transmetohet në “Ora Neës” dhe moderohet nga Drilon Xhepollari. Shumë është folur për golin e anuluar të Aralicës ndaj Partizanit në minutën e fundit, teksa arbitri e ka anuluar me VAR. Hasani është shprehur se gabimet e arbitrave janë të shumta ndaj shkodranëve, aq sa i kanë hequr 30 pikë në kampionat.
“Vllaznia shkoi për një gol ose për barazim ndaj Partizanit. Ndeshja tjetër do të luhet në Shkodër, ku stadiumi do të jetë i mbushur dhe për këtë arsye qëllimi ishte që të mos pësohej gol dhe të kapej në befasi kundërshtari. Ishte një skemë që e këmi përgatitur gjithë javën te momenti i golit dhe çuditërisht arbitri e anuloi për të 10 herë radhazi.
Është e pashpjegueshme sesi këto arbitra marrin zemër të fundosin shpenzimet e presidentëve shqiptarë në këto kohë krize. Nuk e di nëse janë të paaftë apo e kanë bërë me dashje. Dikush duhet të mbaj përgjegjësi për këta arbitra. Ne e pamë që jemi ekip më i mirë se Partizani. Vllaznia i janë anuluar 10 gola në këtë kampionat me VAR, i kanë ikur 30 pikë. Duhet t’i japim dorën Tiranës për titullin kampion, e vendosi me fitoren në Shkodër”, tha Alban Hasani. /Sport Ekspres/