Zlatan Ibrahimoviç është thyerja e rregullit në futboll me sulmuesin suedez që po vazhdon në ritme të larta për të udhëhequr Milanin. Duke parë rëndësinë e madhe që ka brenda fushës dhe jashtë saj, për motivimin e skuadrës, drejtuesit e kuqezinjëve e kërkojnë me ngulm edhe për sezonin e ardhshëm.
Në Itali janë të sigurt se është dhënë konfirmimi edhe nga suedezi, që e ka pranuar bashkëpunimin e mëtejshëm me Milanin. Bëhet fjalë edhe për një sezonin tjetër, ku Ibrahimoviç do të prekë moshën 40-vjeç. Rroga do të jetë e dyfishuar pasi sulmuesi do të përfitojë 6 milionë euro, ndërsa në tryezë është edhe mundësia për të marrë një post të rëndësishëm te Milani pas dy vitesh. /Sport Ekspres/