Teuta prej së martës është zhvendosur drejt Ohrit, aty ku po zhvillon përgatitjet në prag të nisjes së sezonit të ri futbollistik. Trajneri Magani do të shohë sërish gjendjen e ekipit të tij, që tashmë ka ndryshuar fytyrë dhe është më i plotë. Këtë mundësi ja jep miqësorja e sotme me FC Struga Trim Lum, që do të zhvillohet prej orës 17:00.
Në këtë ndeshje stafi teknik do të ketë mundësinë të shohë nga minuta e parë gjendjen e mesfushorit Abe Oluasina, 26-vjeçarit nigerian që iu bashkua durrsakëve në fillim të javës. Ndërkohë janë rikthyer edhe Moçka e Çmajçanin, që ishin shkëputur nga skuadra që prej përfundimit të sezonit futbollistik. Në miqësoren e sotme Teuta do të gjejë një njohje të vjetër, pasi pjesë e ekipit të Strugës është edhe mesfushori Flamur Tairi, që për tre sezone ka veshur fanellën e durrsakëve, duke qenë një nga lojtarët më të spikatur. Aktualisht ai po luan në Maqedoni, ndërkohë që në Shqipëri ka veshur edhe fanellën e Bylisit.
STADIUMI – Ndërkohë që ekipi po punon në Ohër, drejtuesit e klubit po përkujdesen që stadiumi “Niko Dovana” të jetë gati për nisjen e kampionatit. Sikurse dihet, kanë nisur prej rreth një muaji punimet për meremetimin e ambienteve të tribunës kryesore, që është lyer së fundmi, ndërkohë që edhe sektori VIP dhe ai i medias ka pësuar ndryshime. Gjithashtu në tribunën përkarshi janë bërë punime dhe pritet vendosja e stolave, që do t’i jepte tjetër pamje asaj. Një tjetër proces pune që po mbyllet është edhe vendosja e orës elektronike, që kishte dalë jashtë funksioni prej kohësh.