Situatë absurde në fund të ndeshjes së djeshme mes Romës e Veronës. Verdhekuqtë fituan lehtësisht dhe në teori duhej të dilnin nga fusha të lumtur, por dy prej futbollistëve të Romës, mbrojtësit Bruno Peres e Zherson, kishin hesape për të larë me njëri-tjetrin.
Fërkimet gjatë ndeshjes duket se nuk ishin harruar dhe Bruno Peres i kërkoi llogari brazilianit tjetër, i cili reagoi ashpër, duke e shtyrë. U desh ndërhyrja e lojtarëve të tjerë për t’i ndarë, një situatë e sikletshme, që konfirmon edhe një herë se te Roma problemet më të mëdha vijnë nga brenda, ndaj edhe arritja te trofetë është një mision thuajse i pamundur.