Një ngjarje e rëndë ka ndodhur në ndeshjen mes Delvinës dhe Albpetrolit, të vlefshme për Kategorinë e Dytë të futbollit shqiptar. Arbitri i këtij takimi ka rënë pre e dhunës, teksa një person jashtë stadiumit ka goditur me gurë anësorin Elis Pulaj. Një akt i tillë dënohet ashpër nga FSHF, që vjen me një reagim për shtyp, ku u bën thirrje tifozëve të distanohen nga gjeste të tilla që nuk i shkojnë aspak për shtat një sporti si futbolli.
Gjithashtu, Federata kërkon nga organet e Polisicë së Shtetit dhe Prokurorisë që të vendosin përpara drejtësisë agresorin. Vetë FSHF do të caktojë një inspektor disipline, i cili do të zhvillojë një hetim në lidhje me këtë akt të dhunshëm dhe të shëmtuar, që kishte viktimë arbitrin Pulaj./Halit Delibashi-Sport Ekspres/
Njoftimi i FSHF-së:
Federata Shqiptare e Futbollit dënon ashpër dhunën e ushtruar ndaj gjyqtarit Elis Pulaj gjatë ndeshjes Delvina-Albpetroli, e vlefshme për javën e 7-të të Kategorisë së Dytë, Grupi B.
Njëkohësisht, Federata e Futbollit kërkon nga organet ligjzbatuese që të marrin masa të forta për të ndalur aktet e dhunshme, që prishin imazhin e futbollit. Gjithashtu, u bëjmë thirrje Policisë së Shtetit dhe Prokurorisë që veprojnë sa më parë për të ndaluar shkaktarët e dhunës dhe t’i vënë ata para drejtësisë.
Sakaq, Federata Shqiptare e Futbollit do të caktojë një inspektor disipline për të kryer një hetim disiplinor në lidhje me incidentin dhe dhunën ndaj gjyqtarit.
Është e papranueshme që futbolli të penalizohet për shkak të disa individëve të dhunshëm e të papërgjegjshëm.
Federata e konsideron të rëndë ngjarjen e ndodhur në Delvinë e që nuk ka asnjë lidhje me lojën e futbollit dhe frymën e “Fair Play”. Së fundmi kërkojmë nga sportdashësit, që të distancohen nga veprime të tilla të dhunshme, që nuk kanë asnjë lidhje me lojën e bukur të futbollit, por vetëm e dëmtojnë atë.