Pesë korriku mund të jetë një tjetër datë historike për futbollin në Kosovë dhe për Prishtinën në veçanti. Pas Dritës, që siguroi kualifikimin në turin e parë të Champions, edhe skuadra kryeqytetase ka shansin që për herë të parë në histori të luajë në turin e parë kualifikues të Europa League.
Skuadra e drejtuar nga Mirel Josa do të luajë sot në orën 19:00 në stadiumin “Adem Jashari” të Mitrovicës përballë FC Europa nga Gjibraltari. Prishtina e nis duelin në pozita mjaft komode, pas barazimit 1-1 të regjistruar në ndeshjen e parë.
Fituesve të Kupës së Kosovës gjatë edicionit të kaluar do ti mjaftonte një barazim pa gola për të vazhduar më tej, por trajneri Josa ka kërkuar që ekipi të mbetet i përqendruar dhe të mos kënaqet me pak. “Nuk do të hyjmë në fushë me mendimin për të barazuar, apo se rezultati 0-0 na mjafton. Do të luajmë për fitore”, tha tekniku nga Tirana.
Në rast të kualifikimit, sipas shortit të përcaktuar, Prishtina do të luajë përballë Fola Esh nga Luksemburgu, një kundërshtar që e bën ekipin e kryeqytetit kosovar të ëndërrojë se mund ta vazhdojë sa më gjatë ëndrrën europiane.