Italiani ishte shumë pranë largimit, madje u kërkuar edhe zëvendësuesi i tij. Merkatoja, rezultatet e skuadrës kanë bërë që Drejtori Sportiv të mos e ketë të gjatë
Italiani, me afrimin e Olsi Ramës si Drejtor i Përgjithshëm, duket se nuk do ta ketë të gjatë në skuadrën e Partizanit. Antonelo Preiti u afrua me “demat” në fund të sezonit të kaluar duke qenë ndër një ndër besnikët e Drejtorit të Përgjithshëm Luçiano Moxhi. Megjithatë, merkatoja e verës dhe rezultatet e Partizanit në fazën e parë të sezonit kanë lëkundur shumë pozitat e tij, madje kanë bërë që italiani të humbasë “mburojën” e Moxhit. Drejtori i Përgjithshëm nuk e pengon rrugën e largimit të Preitit.
LARGIMI – Drejtori Sportiv i Partizanit ishte vetëm një hap largimit në momentin që ndodhi rokada e pankinave. Në rolin e italianit u kërkuar edhe zëvendësuesi i tij, por nuk u gjet gjuha e përbashkët me asnjë nga kandidatët e përmendur. Kjo ka bërë që Preiti t’i shpëtojë stuhisë së parë, megjithatë “shtrëngata” e vërtetë në klubin e Partizanit do të nisë në merkaton e janarit, aty ku do të ketë ndryshime të mëdha. Kjo jo vetëm në grupin e lojtarëve, por edhe në administratë. Afrimi i Olsi Ramës si Drejtor i Përgjithshëm do të spostojë edhe Moxhin si këshilltar në krahun e presidentit Demi. Ky është roli që italiani ka deklaruar se mban, por në realitet 80-vjeçari ka qenë Drejtor i Përgjithshëm. Këtë e ka pranuar edhe trajneri aktual Sulejman Starova në daljet e tij publike, por edhe çdo person tjetër në klubin e kuq. Madje, edhe presidenti Demi ka pohuar se është Moxhi që do të jetë përgjegjës për merkaton dhe afrimet e largimet. Ashtu siç ndodhi në verë.
KU GABOI PREITI? – Italiani duket i përkushtuar, pasi ka ndjekur skuadrën në seancat stërvitore duke i qëndruar shumë pranë edhe Julianos. Megjithatë, rezultatet nuk i japin aspak të drejtë. Preiti bëri autogol akoma pa marrë “frenat” e Partizanit, pasi e nënvlerësoi kampionatin shqiptar dhe cilësinë e tij. Merkatoja ishte skandaloze duke afruar lojtarë që nuk arrijnë të grumbullohen as në 18-she dhe jo më të japin kontribut. Afrimet e italianit lanë shumë për të dëshiruar. Në fund, te “demat” ka një bilanc dhe arka e klubit është rënduar nga merkatoja e gabuar. Dikush duhet të mbajë përgjegjësi, Julianoja ishte i pari. I dyti duket se do të jetë Preiti, ndërsa reaksioni zinxhir mund të prekë edhe “të paprekshmin” Moxhi.