Kohët e fundit dolën disa thashetheme se trajneri i Kosovës, Bernard Challandes është pjesë e kompanisë së menaxhimit të lojtarëve “Footuros”. Kjo shoqëri zvicerane thuhet se ka në pronësi 5-6 futbollistë që aktivizohen tek Kosova. Për këtë arsye Challandes akuzohet se po përdor qëllimisht përfaqësueset e Kosovës për te promovuar lojtarët që janë nën menaxhimin e kësaj kompanie.
Menaxheri shqiptar, Gëzim Ibrahimi i cili është pjesëtar i kësaj kompanie prej 10 vitesh, në një intervistë për portalin Indeksionline ka mohuar kategorikisht se ka një marrëveshje sekrete mes “Footuros” dhe Challandes. “Nuk janë 5-6 lojtarë të ‘Footuros’ që luajnë te Kosova, është vetëm një, Idriz Voca. Shefi René Strittmatter, ka qenë kryetar i Zurichut para disa vitesh, kur Challandes ishte trajner aty dhe nga ajo kohë e deri sot kanë ruajtur marrëdhënjet e mira me njëri tjetrin, por Challandes nuk ka asnjë aktivitet që e lidh me neve” -deklaroi Ibrahimi për Indeksonline. /Elio Hajdari-Sport Ekspres/