Legia e Varshavës gjendet në një nga situatat më të vështira në gjithë historinë e saj. Kampionët në fuqi të Polonisë gjenden në vendin e parafundit në renditje dhe rrezikojnë seriozisht rënien nga kategoria. Për këtë situatë të krijuar, ish-lojtari i Legias, Silvester Cerezevski, ia vë fajin lojtërëve.
Në një intervistë të dhënë për “WP Sportowe Fakty”-n, Cerezevski i quan pseudo-futbollistë lojtarët e klubit polak, ndërsa sheh menaxherët e tyre si të vetmit që kanë dalë të fituar deri më tani. Kujtojmë se ndër transferimet e fundit të Legias janë edhe tre shqiptarë, Ernest Muçi, Lirim Kastrati dhe Jurgen Çelhaka.
“Shumë lojtarë nuk e meritojnë një vend në këtë ekip. Agjentët e këtyre pseudo futbollistëve janë fituesit më të mëdhenj në këtë situatë. Për shkak të lëndimeve, liderët janë jashtë dhe zëvendësit e tyre nuk po arrijnë të marrin përsipër detyrën. Pas ndeshjeve me rivalët nga fundi i tabelës, shihet se ata nuk janë të përshtatshëm”, ka thënë ndër të tjera Silvester Cerezevski./Halit Delibashi-Sport Ekspres/