Presidenti i Federatës Gjermane të Futbollit (DFB) i është rikthyer dhe një herë çështjes Ozil. Në një prononcim për “Bild”, Reinhard Grindel është shprehur se i ka ardhur shumë keq, që nuk e mbrojti mesfushorin nga sulmet raciste. Ai tregon se Federata nuk kishte asnjë qëllim për të bërë “kokë turku” Ozilin për rezultatin zhgënjyes të kombëtares në Botëror.
Lojtari i Arsenalit u akuzua për foton e bërë me presidentin e Turqisë dhe ndaj atij shpërthyen akuza nga tifozë të shumtë, por dhe personalitete të futbollit gjerman. 29 vjeçari nuk duroi më dhe shpalli vendimin e tij për t’u tërhequr nga kombëtarja gjermane.
“Pas sulmeve racistë, do të kisha dashur të shprehja veten në mënyrë më të qartë në mbështetje të Ozil, i cili pësoi diçka krejtësisht të papranueshme. Më vjen keq që ai u ndje i braktisur nga Federata”, përfundon kreu i futbollit gjerman.