Në ditën e sotme janë zhvilluar dy ndeshjet e radhës të kampionatit shqiptar. Kukësi nuk ka gabuar në transfertë ndaj Egnatias, për të fituar në shifrat 0-2. Ditë e qetë për verilindorët që me Shqiprim Taipin dhe Ndrecën kanë likuiduar ekipin e drejtuar nga Ramadani.
I gjithë interesi ishte te finalja e vogël, Laçi-Vllaznia. Bëhej fjalë për ekipin që do të ndiqte Tiranën dhe për këtë arsye, fitorja ishte detyrim për të dy skuadrat. Shumë raste dhe aksione që janë ndalur nga heroi Dajsinani, por goli që vendosi takimin ishte penalltia e saktë që ekzekutoi Guindo. Tanimë Laçi ka 6 pikë më pak se Tirana ndërsa Vllaznia humbet rrugën e titullit. Më poshtë gjeni intervistat e trajnerëve për “Supersport”:
Longo: “Ishte një fitore shumë e rëndësishme. Duam t’ia dedikojmë këtë fitore Irisit, përgatitësit tonë fizik. Ai ka humbur vëllanë dhe po kalon një moment të vështirë. Jemi afër atij, kjo fitore është për të. Ishte momenti kur duhet të reagonim pas humbjes ndaj Tiranës, e treguam se dimë të reagojmë. Ditëm të menaxhonim mirë, kishte edhe vertikalizime, por nuk ishte e nevojshme të shtynim shumë. Dominuam dhe morëm tre pikët”