Është përmbyllur me sukses edicioni i dytë i Kampionatit Kombëtar të Futbollit 5×5 në zonën e Elbasanit dhe të Cërrikut, teksa janë shpallur tashmë edhe skuadrat kampione të këtyre zonave. Në zonën e Elbasanit në vendin e parë arriti të renditjes skuadra e AMG Plan Studio 5×5, e cila grumbulloi 46 pikë.
Në këtë zonë morën pjesë 10 skuadra, duke luajtur me sistem vajtje–ardhje dhe gjatë gjithë kampionatit u vu re një shpirt i lartë gare nga të gjitha ekipet pjesëmarrëse, që dhuruan shumë emocione dhe gola përgjatë sezonit. Trofeun për skuadrën fituese e dorëzoi “Mjeshtri i Madh” i futbollit, ish-portieri i Elbasanit dhe Kombëtares, Bujar Gogunja, i cili uroi edhe ekipin fitues.
Ndërsa, në zonën e Cërrikut, në një kampionat ku morën pjesë 8 skuadra, pas 16 ndeshjeve të zhvilluara, ekipi që u shpall kampion ishte MFC Genus 5×5, i cili në përfundim të sezonit grumbulloi plot 42 pikë, duke qenë superior në krahasim me skuadrat e tjera rivale.