Te Partizani nuk e konfirmon askush zyrtarisht, por Mark Juliano dje ishte shumë pranë shkarkimit, aq sa edhe barazimi nuk e shpëtonte në Durrës. Presidenti Demi, i zhgënjyer nga një fillimsezoni shumë i dobët, i kishte lënë edhe një shans të fundit në Durrës dhe pas një pjese të parë mediokre, shpëtuar nga goli në fund i Trashit, për Julianon orët ishin të numëruara.
Goli i Sukajt në fund i dha fitoren e parë Partizanit dhe shpëtoi edhe trajnerin italian, i cili pas ndeshjes në Supersport e pranoi se priste gjithçka.
“Ultimatum? Duke qenë një skuadër e madhe të gjithë mund të kenë dyshimet e veta. Në një projekt të ri asgjë nuk është e lehtë. Kam eksperiencën e duhur për ta menaxhuar një situatë të këtillë. Unë do të bëjë maksimumin. Situatat i kisha të qarta para fillimit të ndeshjes dhe e kuptoja momentin ku ndodhej ekipi”.