Sokol Xhihani përcjell për emisionin “Kuq e Zi” në “Supersport” atmosferën nga Rejkjaviku, atje ku Shqipëria luan sfidën e parë në Ligën e Kombeve kundër Islandës. Gazetari sportiv ka mbetur i befasuar nga mbështetja e madhe për Kombëtaren tonë, pasi tifozë shqiptarë nga i gjithë goli kanë udhëtuar drejt Islandës për të përkrahur ekipin.
“Nuk janë ndoshta me mijëra, por janë nga çdo cep i botës. Pak më parë ishte një çift që kishte ardhur nga Bostoni. Ka tifozë që kanë ardhur nga Danimarka, nga Italia, nga Suedia. Jam habitur se si kishte kaq shumë shqiptarë këtu në Islandë dhe e donin përfaqësuesen. Njëri më tha se ‘kushti që vendos në vendet ku punoj është që datat kur luan Kombëtarja i dua pushim. Nëse nuk m’i lënë, atëherë nuk firmos’. Kishte tifozë që erdhën edhe te hoteli i Kombëtares”, ka thënë Sokol Xhihani./Halit Delibashi-Sport Ekspres/