Dy edicione më parë ishte disi jo shumë normale që dy rivalë për titull të stërviteshin paralelisht. Kukësi dhe Partizani ndanin të njëjtin terren për t’u përgatitur për ndeshjet e Superiores, madje dhe kur kishin për t’u përballur mes tyre. Edhe këtë edicion diçka e tillë duket se do të përsëritet, pasi Partizani prej pak kohësh ka vendosur që të stërvitet në Pezë, aty ku Kukësi ka vite që kryen përgatitjet e tij.
Ditën e djeshme oraret e dy skuadrave që në vitet e fundit kanë qenë pretendente për kreun e tabelës ka qenë i njëjtë dhe në dy fusha paralele si Armando Cungu ashtu dhe Skënder Gega kanë udhëzuar të besuarit e tyre. Sërish komshinj dhe ndoshta sërish rivalë për kampion, por kjo mbetet për t’u parë, pasi jemi ende në metrat e para të kampionatit.
Kukësi dhe Partizani do të ndeshen mes tyre në javën e tetë të kampionatit. Do të jetë mjaft interesante për të parë këtë sfidë në distancë sërish, ku mjaftojnë pak metra, për të parë skemat e kundërshtarit! “I dashur armik”, ja ku jem isërish komshinj!