Orges Shehi ka dalë në konferencën për shtyp para ndeshjes me Beshiktashin. Tirana do të kërkojë kualifikimin më tej, por objektivi është shumë i vështirë. Ekipi turk fitoi me shifrat 3-1 në takimin e parë. Megjithatë trajneri i bardhebluve kërkon që nënkampionët e Superiores të kalojnë më tej në Conference League.
“Do të kërkojmë të jemi në vazhdën e ndeshjeve të fundit, edhe pse jemi koshientë që kemi përballë kundërshtar të fortë. Ta nisim ku e lamë në ndeshjen e parë. Shpresoj që të kemi një skuadër me ekuilibër, sepse ekuilibri është shumë i rëndësishëm përballë kundërshtarëve të tillë. Sigurisht që ndeshjet më pas vendosen nga episode.
Ekipe me buxhete të tilla është më mirë t’i përballësh më vonë. Me përvojën që kam unë, është hera e parë që përballemi me kundërshtar të nivelit të tillë. Do të futemi në fushë për të dhënë më të mirë, me synimin për ta kthyer rezultatin. Shanset varen nga situatat që do të krijohen gjatë lojës, që të afrojnë apo të të largojnë nga objektivi”, tha Shehi. /Sport Ekspres/