Flamurtari ka luajtur një miqësore sot në Fier, përballë Apolonisë, sfidë që i ka shërbyer trajnerit Shpëtim Duro për të testuar lojtarët para sfidës kundër Skënderbeut, të enjten e ardhshme në Vlorë (17:00).
Kuqezinjtë e nisën me formacionin më të mirë, atë që me shumë gjasa do të zbresë në fushë ndaj Skënderbeut, ndërsa mungonte Pollozhani, pasi do të jetë i pezulluar mesjavën e ardhshme.
Në formacion kthehet mesfushori Sidibe, ndërsa pjesa tjetër e formacionit nuk ka shumë ndryshme, por mund të luajë nga fillimi braziliani Zhufo, pozitiv në ndeshjen e fundit kundër Kukësit, ku dha asistin për golin dhe shënoi edhe golin në shtesë, që u anulua mes shumë polemikave.
Vlonjatët fituan sot 2-1, në një sfidë ku sulmi konfirmoi se është në formë mjaft të mirë. Bushiç e Ardit Hoxhaj gjetën golin, ndërsa mungoi Danilo Alvesh, me probleme të vogla fizike.
Për Apoloninë shënoi sulmuesi në formë Blerim Krasniqi.
