Pak minuta më parë janë mbyllur katër ndeshjet e Superiores. Kukësi arriti të fitonte me shifrat 3-0 ndaj Laçit falë perlës së Ndrecës nga goditja e dënimit dhe dopietës së Barbosës, që erdhi nga stoli për të siguruar tre pikët. Me këtë fitore verilindorët largohen nga zona e ftohtë pas shumë javësh dhe lënë Erzenin pas vetes.
Nga krahu tjetër Kastrioti bëri surprizën duke mundur Egnatian 1-0 falë golit të Grecës. Po ashtu Bylisi mundi Erzenin me shifrat 1-2 falë dopietës së Kacorrit, duke zhvlerësuar realizimin e Alan. Pavarësisht se shumëkush i mendoi të rrëzuara, Bylisi dhe Kastrioti kanë hyrë në vallen e mbijetesës. Gjithashtu Vllaznia bëri hap pozitiv duke fituar 1-0 me Teutën falë golit të Cobës në minutën e 8 të takimit. Më poshtë gjeni intervistat e trajnerëve për Oversport:
Sedloski: “Dua të falënderoj lojtarët për tre pikët e marra, nuk ishte e lehtë. E kemi merituar fitoren dhe këto tre pikë. Duhej ta kishim mbyllur ndeshjen më herët, por ky është futbolli. Kemi luajtur pak me stres. Lojtarët ia kanë dalë. Më të rëndësishme për ne ishin tre pikët. Kemi pasur shumë lojtarë të dëmtuar”.
Martini: “E filluam pjesën e parë qetë, gabuam te rasti i golit i Vllaznisë. E rritëm nivelin në pjesën e dytë, e mbajtëm Vllazninë në gjysmëfushën e saj, kishim shanset tona, por ky është futbolli. Nëse do të merrnim rezultat pozitiv sot do të ishim më afër Europës. Por tani rrezikojmë Europën dhe kemi siklete nga vendet e fundit që janë afruar”.
Tetova: “Ekipi im nuk ishte në ditë të mirë sot, nuk kishim freskinë. Është diçka normale se kemi pasur shumë ndeshje. Shpresoj ta kalojmë këtë gjë dhe të jemi gati për ndeshjen tjetër. Sigurisht që ndikoi edhe kartoni i kuq i Egnatias në minutën e 30. Ne duhet ta arrijmë Kupën nga kampionati, nga Kupa nuk është asgjë e sigurt se kemi finalen për të luajtur”.
Shensoji: “Sot erdhëm, pamë dhe fituam. Nuk ka filozofi. Ne kemi luajtur gjithmonë futboll, thjesht nuk po realizonim dot. Ata që luajnë lloto, menduan se Erzeni luan brenda dhe fiton, por në fakt ne nuk kishim se çfarë të humbisnim më. Kjo ishte një ndeshje si Play Out për ne dhe ne fituam ndeshjen në aspektin psikologjik. Erzeni humbi se kishte shumë stres. Mund të kishim shënuar dhe tre apo katër gola të tjerë”.