Largimi i Piolit ishte cilësuar si mjaft i sigurt dhe Milani po bëhej gati për epokën Ragnick. Megjithatë në fund të pjesës së parë, të cilën Milani e fitoi me rezultatin 1-2 përballë Sassuolos, gjithçka kalon në kthesën e befasishme, pasi tashmë trajneri aktual i Milanit do të qendrojë të paktën dhe për një sezon të ri. Duket se rezultatet e shkëlqyera të Milanit kanë bindur drejtuesit për të vazhduar me Piolin. Lajmin e bëri të ditur Marc Kosicke, konsulent i Ragnick, i cili deklaroi se ishte konfirmuar nga kryesia e skuadrës, që Milani nuk është gati për ndryshimin e trajnerit.
“AC Milan dhe Rangnick kanë arritur një marrëveshje që momentalisht nuk është koha e duhur që të ketë bashkëpunim mes tyre.Pas rezultateve të mira të Piolit, ata së bashku vendosën që Ralf nuk do të marrë rol në Milan sezonin e ardhshëm”, u shpreh Kosicke. Një shembull ky i treguar nga ana e kuqezinjëve ku pavarësisht se Ragnick i mungonte vetëm zyrtarizimi, nuk hedh poshtë rezultatet pozitive të arritura nga Pioli për ta larguar “padrejtësisht”. /Elio Hajdari-Sport Ekspres/