Barcelona lëshoi dje një komunikatë për shtyp që do të trondiste të gjithë tifozët katalanas. Messi nuk do të mund të jetë më lojtari i tyre dhe nuk mbetet gjë tjetër veçse palët ti japin lamtumirën njëri-tjetrit. PSG mbetet ekipi favorit për të siguruar firmën e yllit argjentinas, ndërsa vetë trajneri Pochettino pranoi në konferencë për shtyp se transferimi i 6 herë fituesit të Topit të Artë është një mundësi mbi të cilën klubi po punon.
“Kur flasim për një lojtar si ky, ka kohë dhe mundësi që mund të kalojnë … ose jo. Klubi po punon, ne po analizojmë të gjitha mundësitë dhe kjo është njëra prej tyre. Ne jemi të fokusuar në fillimin e sezonit. Në të njëjtën kohë, jemi të fokusuar te klubi, i cili po punon në dritaren e transferimeve në një mënyrë diskrete dhe po punon për të përmirësuar ekipin në çfarëdo mënyre të mundshme për të arritur objektivat që kemi vendosur në fillim të sezonit.
Për sa i përket Lionel Messit, ne e dimë se çfarë ndodhi dje. Unë nuk do të them asgjë ndryshe nga kjo. Ne jemi plotësisht të fokusuar në mposhtjen e Troyes dhe fillimin e mirë të sezonit. Transferimi i Messi-t do të thotë largim i Mbappe-së? Jo”, ka deklaruar Mauricio Pochettino./Halit Delibashi-Sport Ekspres/