Nga Barcelona te Juventusi, kjo mund të ishte lëvizja e bujshme e Rei Manajt këtë merkato. Sulmuesi shqiptar duket të ketë lindur me këmishë, teksa karriera e tij është lidhur shpesh me emra të mëdhenj të arenës europiane. Juventusi tentoi në ditët e fundit të merkatos blerjen e talentit shqiptar, që do të gjente një tjetër bashkëkombas te bardhezinjtë, Xhakomo Vrionin.
Drejtuesit e “Zonjës së Vjetër“ i ofruan në këmbim Barcelonës portierin Israel, por në fund duket se gjuha e përbashkët nuk është arritur. Sulmuesi shqiptar do të bëhej pjesë e ekipit U23 të Juventusit, megjithëse shansi mund t’i jepej edhe në ekipin e parë, duke parë se kohët e fundit te Juventusi po i lëshojnë më tepër terren të rinjve. Madje një ëndërr të tillë e bëri në realitet edhe Xhakomo Vrioni, i cili ka luajtur minutat e para me gjigantin italian./Halit Delibashi-Sport Ekspres/