Sven Goran Erikson ka zbuluar një ngjarje interesante për “BBC Radio 5“. Trajneri suedez ka kryer një vizitë drejt Piongiang ku përfaqësues së Koresë së Veriut i kanë kërkuar të ndërhyjë në shortin që FIFA do të mbante për grupet e Kampionatit Botëror që do të zhvillohej në Afrikën e Jugut. Megjithatë Erikson ia bëri të qartë se diçka e tillë nuk mund të ndodhte, ndërsa Kombëtarja aziatike më pas përfundoi në një grup “ferri“ së bashku me Brazilin, Portugalinë dhe Bregun e Fildishtë.
“Ata (përfaqësuesit e Koresë së Veriut) e dinin që unë isha anëtar i Komitetit të Futbollit të FIFA-s. Ata thanë: ‘A mund të na ndihmoni ju lutem?’. ‘Sigurisht që mund t’ju ndihmoj, nëse mundem’, u thashë. Mendova se donin topa apo këpucë apo diçka të tillë.
Ata thanë: ‘Ne duam të kemi një short të lehtë’. Donin të kishin ndihmë me shortin. Sigurisht që i thashë: ‘A e thoni vërtet atë që unë [mendoj]? Unë nuk mund ta bëj këtë. Askush nuk mund ta bëjë këtë. Kjo është absolutisht e pamundur dhe është kri.minale, qoftë edhe të provosh’.
Por ata nuk më besuan kurrë. Gjëja e mahnitshme është se dukej sikur ata nuk besojnë se unë nuk mund ta bëja. Besuan se unë thjesht nuk doja ta bëja. Shumë e çuditshme“, ka zbuluar Sven Goran Erikson./Halit Delibashi-Sport Ekspres/