Çudia, Çelsi kërkon t’i marrë portierin Milanit

Milani në fund të sezonit të shkuar zyrtarizoi marrëveshjen me portierin e Napolit Pepe Reina, i cili dilte i lirë në treg, sepse i mbaroi kontrata.

Në fillim të korrikut, sipas rregullores, Milani depozitoi në Ligë kontratën 3-vjeçare me portierin veteran, i cili ka qenë në formë të shkëlqyer te Napoli dhe është një garanci, nëse Milani shet Donarumën.

Megjithatë, Premium Sport në Itali sot publikon një lajm të bujshëm: Çelsi kërkon Reinan!

Trajneri Mauricio Sarri nuk dëshiron të shpenzojë një thes me para për Donarumën apo ndonjë portier tjetër, ndërsa i duhet pasuesi i Kurtuasë, që po shkon te Reali.

Trajneri italian kërkon të bashkohet sërish me Reinan dhe i ka kërkuar Çelsit të blejë spanjollin. Ndonëse nën kontratë, Reina largohet pa probleme nëse Çelsi paguan, por Milani zor se pranon, edhe pse milionat për Reinan do ishin fitim “qyl”.