Eusebio Di Françesko e ka kaluar momentin e vështirë dhe ka ditur të rikthejë Romën te rezultatet pozitive. Katër fitore rresht mes kampionatit dhe Champions Ligës, 14 gola të shënuar dhe vetëm një i pësuar nga Imobile në derbi. Roma është rikthyer dhe trajneri është shfaqur në formë pas fitores me Empolin.
Një detaj i veçantë ka ndodhur gjatë ndeshjes së mbrëmshme. Di Françesko i ka ulëritur në një moment kapitenit Daniele De Rosi gjatë ndeshjes. Qëllimi ishte ndërrimi i skemës taktike, pasi Empoli po luante mirë dhe po ushtronte presion.
Kur është pyetur për faktin që po i bërtiste mesfushorit të tij, trajneri ka lëshuar një batutë: “Po i ulërija, sepse De Rosi është i shurdhët dhe nuk dëgjon nga njëri vesh.”