Napoli po kalon një nga sezonet më të mira në historinë e klubit. Pas shumë vitesh, të kaltrit janë pranë fitimit të titullit kampion në Itali, si dhe kanë prekur çerekfinalen e Ligës së Kampionëve. Pjesë e 11-shes së suksesshme të Spaletit është edhe Amir Rrahmani. Mbrojtësi shqiptar ka zhvilluar një sezon të shkëlqyer në prapavijë, duke spikatur te napoletanët.
Por kontrata mes palëve ende mbetet pezull. Sipas “Corriere dello Sport“, takimet mes klubit dhe menaxherit të Rrahmanit nuk kanë prodhuar një shtërngim duarsh në fund. Palët nuk po gjejnë gjuhën e përbashkët për të rinovuar kontratën që skadon në vitin 2024. Vullneti për të vijuar bashkëpunimin është i përbashkët, por duket se parata po ndajnë palët nga akordi përfundimtar./Halit Delibashi-Sport Ekspres/