Ernest Muçi ishte heroi i Legias së Varshavës mbrëmjen e sotme. Sulmuesi shqiptar hyri në fushën e lojës në minutat shtesë të kohës së rregullt dhe në sekondat e fundit të ndeshjes shënoi golin që i dha kualifikimin polakëve përballë Austrisë së Vienës. Talenti i dalë nga akademia e Tiranës ka dhënë një intervistë pas përfundimit të sfidës, ku ka dhënë përshtypjet e tij mbi këtë përballje mjaft dramatike dhe emocionuese.
“Ishte një ndeshje e çmendur. Djemtë dhanë gjithçka dhe e meritonin ta fitonin këtë ndeshje. Është shumë e rëndësishme për ne që të kalonim në raundin tjetër. Jam shumë i kënaqur që hyra në fushë dhe fituam ndeshjen. Gjatë gjithë kohës kur isha në stol po mendoja se nuk ka më ndeshje përtej kësaj. Kur ishte 3-3 mendova: “Në rregull, kohë shtesë“. Por isha me fat që patëm një shans tjetër dhe shënova.
Sigurisht që doja ta bëja këtë. Por ka të bëjë më shumë me instiktin. Unë nuk mendoj për asgjë kur hyj në fushë. Marr vendime në moment. Jam i lumtur që mora vendimin e duhur dhe fituam ndeshjen. Kundërshtari i radhës? Do të jetë një ndeshje e vështirë, por edhe kjo ishte një ndeshje e vështirë. Për të shkuar në grupe na duhet të bëjmë historinë përsëri kundër tyre. Jemi gati dhe do të përgatitemi”, ka deklaruar Ernest Muçi./Halit Delibashi-Sport Ekspres/