Teuta ka marrë një fitore spektakolarë mbrëmjen e sotme. Durrsakët “çmenden“ kundër Kukësit dhe si asnjëherë më parë për këtë sezon në “Abissnet Superiore“ arrijnë të shënojnë 4 gola në një ndeshje. 4-1 është rezultati i fiksuar pas vërshëllimës së trefishtë të Kridens Metës.
Rubin Hebaj ka shkëlqyer këtë mbrëmje, teksa mban firmën e 3 prej golave të realizuar. Ishte pikërisht shkodrani ai i cili zhbllokoi rezultatin në minutën e 12 me aën të një goditjeje me kokë pas ekzekutimit të një goditjeje këndi. Musta barazon në minutën e 36, por goli i tij do të shërbejë vetëm për statistikë. Hebaj e nis pjesën e dytë përsëri me festë, duke shkundur rrjetën në minutën e 52-të. Më vonë, në të 68-n, ishte Daci ai i cili mposhti Xhikën me një parabël.
Megjithatë rrebeshi i golave nuk do të përfundonte këtu, pasi Rubin Hebaj e dërgon përsëri topin në rrjetë në mintën e 84-t. Këtë herë nga pika e bardhë e penalltisë. Shkodrani i jep kështu një fitore mjaft të rëndësishme Teutës dhe nxjerr nga Europa Kukësin, i cili tashmë renditet në vendin e 4-t, me pikë të barabarta me Partizanin. Pas përfundimit të ndeshjes, trajnerët kanë dhënë intervistat e tyre për “Gol pas Goli” në “Supersport”.
Arapi (Teuta): “Normalisht që ndjej kënaqësi kur ekipi interpreton ato që bëjmë gjatë stërvitjeve. Futbolli është i pabesë. Nga një ndeshje e mirë që mund të bësh njëherë dhe të ngrihen shpresat, mund të humbasësh javën tjetër. Kështu që duhet të qendrojmë të gjithë me këmbë në tokë, duke filluar nga unë i pari. Të gjithë lojtarët, sidomos pjesa para u paraqitën shumë mirë. Kampionati ka hyrë në një fazë shumë të vështirë. Me dy fitore rresht mund të pretendosh të kapësh vendin e 4-t apo të 5-të, por me një humbje mund të shkosh prapë në ato ujëra. Sido që të jetë rezultati, dua një ekip që të mos ndryshojë sjelljen në fushë”.
Longo (Kukës): “Sot nuk mund të flas për 7 mungesat që kishim. Nuk është e drejtë për ta dhe për Kukësin. Problemi është se kur bënë këto gabime si fëmijë, është e vështirë. Nuk mund t’i japësh atyre topin për të shënuar. Këto janë gabime foshnjarake. Kemi humbur raste pas 1-1. Është një punë e bërë për 9 muaj dhe sot bëjmë gabime. Kjo ndodh kur duhet të mënaxhosh presionin e madh që ka në ekip. Që herën e parë kur erdha këtu u thashë: ‘Qetësohuni, qetësohuni. Ti marrim ndeshjet një nga një‘. Por jo të gjithë më dëgjuan. Ka presione nga mbrapa që nuk do i zbuloj deri në momentin e fundit. Kjo ndodh kur hedh hapin më të gjatë se këmba”./Halit Delibashi-Sport Ekspres/