Nuk vonon shumë dhe Gentian Muça prezantohet te skuadra e re ku do të vijojë karrierën. Vendimi për t’u larguar nga klubi ku mbante edhe shiritin e kapitenit, Tirana, erdhi disi papritur, ndërsa arsyeja ishte dëshira për t’i hapur rrugë talenteve të reja. Megjithatë dashuria e Muçës për ngjyrat bardheblu nuk ndryshon. Qendërmbrojtësi ndërron ekipin dhe kryeqytetin, por vazhdon të mbajë veshur të njëjtat ngjyra, ato bardheblu.
Prishtina njofton të gjithë përmes një postimi në faqen zyrtare, se ish-kapiteni i kampionëve në fuqi të Superiores është goditja e radhës në merkato. Pas Micit dhe Lilajt, një tjetër emër me shumë vite eksperiencë mbi shpatulla hedh firmën për skuadrën nga Kosova, që këtë vit ka shpallur hapur kandidaturën për titullin kampion./Halit Delibashi-Sport Ekspres/
Njoftimi i klubit:
Kapiteni i Tiranës ndërron klubin – nuk ndërron ngjyrat
Qendërmbrojtësi Gentian Muça futbollisti i ri i Prishtinës
Prishtinë, 28 shtator 2020 – Prishtina ka arritur me marrëveshjen me ish-kapitenin e Tiranës, Gentian Muça. I lindur më 13.05.1987 në Tiranë, pothuajse tërë karrierën futbollistike e ka kaluar si futbollist i Tiranës dhe kur ka ndërruar klub ka qenë i huazuar, si në Bylys, Dinamo e Tiranë dhe Kukës. Ndërsa ka qëndruar edhe tek Vllaznia e Shkodrës dhe Flamurtari i Vlorës.
Muça, me shumë përvojë, me Tiranën në edicionin 2019/20, si kapiten i skuadrës, është shpall kampione pas dhjetë vitesh mungesë titulli.
“Janë lëvizje që e pasojnë njëra tjetrën. Gjithsesi, pa dashur të merrem me të kaluarën, dua të fokusohem për të ardhmen. Pra, tek Prishtina. Jam i lumtur që gjendem këtu, në këtë qytet, kryeqytet – ashtu sikurse edhe Tirana, dhe jam shumë i emocionuar për aventurën e re”.
“Sigurisht që viteve të fundit futbolli në Kosovë ka qenë në fokusin jo vetëm të shtetit të Kosovës, por edhe në Shqipëri dhe jo vetëm për atë çfarë është zhvilluar në fushën e lojës, por edhe jashtë saj, nga ajo se çfarë ka bërë shteti që të zgjohet interesi, vëmendja jo vetëm e publikut, por i tërë ambienti sportiv duke përfshirë edhe lojtarë shqiptarë të cilët kanë ardhur dhe luajnë këtu. Falë të gjitha këtyre gjërave, mund të them që futbollin në Kosovë e njoh”.
“Sigurisht që e njoh Prishtinën dhe më ka ardhur shumë keq që dy herët e fundit e ka humbur kampionatin në ndeshjen e fundit. Gjithashtu Prishtinën e kam ndjekur edhe prej profesor Mirel Josës”.
“Kam shumë pritshmëri, e njoh organikën e skuadrës dhe dy blerjet e fundit nga Shqipëria, si Lilaj dhe Mici, të cilët i njoh më mirë. Sigurisht që jo vetëm tek pritja e pjesëmarrjes në garat e Evropës, por, pa dashur të flas sepse jam i ri, por po e besoj se janë të gjitha mundësitë për t’u shpall kampion duke e marr shkas edhe gabimet që kanë mundur të bëhen në ato vite që ekipi e ka humbur titullin në ndeshjet e fundit”.